Arsenal u eliminua nga faza e tretë e FA Cup nga Nottingham Forest. Mes futbollistëve të “Topçinjve” që ka zhgënjyer më shumë, ishte pikërisht Alex Iwobi.
Por, veç performancës së shëmtuar në fushë, futbollisti përfundoi në qendër të polemikave për disa foto të publikuara nga tabloidi britanik “The Sun”, teksa është në shoqërinë e disa miqve në një klub nate të njohur në Londër. Gjithçka vetëm pak orë nga ndeshja që më pas u humb me rezultatin 4-2 ndaj Nottingham.
Në konferencë për mediat, trajneri Arsene Wenger foli për masa ndëshkimore të mundshme ndaj futbollistit: “Duhet ta shoh, por është e papranueshme, duhet parë se sa kohë ka qëndruar në atë festë, sepse është shumë e rëndësishme, vetëm më pas do të vendos”.
Por, sikur kjo të mos mjaftonte, vetëm në orët e fundit kanë mbërritur edhe sinjalizime se në atë festë ka qenë e pranishme edhe një sasi droge, por në këtë rast, trajneri është pozicionuar në krah të futbollistit të tij. “Nëse dikush pranë teje konsumon drogë, çfarë mund të bësh ti? Je përgjegjës për sjelljen tënde, jo për atë të fqinjit tënd”, deklaroi Wenger.
