Milani ka rënë dakord që të shesë mesfushorin e talentuar, Manuel Lokateli, tek ekipi i Sasuolos. Negociatat vazhdonin prej kohësh, dhe tashmë duket se kanë marrë një zgjidhje. Siç raporton Sky Italia, është rënë dakord që transferimi të bëhet për shumën e 12 milionë eurove, plus 2 milionë të tjera në formë bonusesh.
Gjithsesi, në kontratën e shitjes ekziston një klauzolë, e cila lejon Milanin ta riblejë Lokatelin në të ardhmen. Mesfushori nuk është nisur për në Madrid, për trofeun “Bernabeu” që kuqezinjtë do të zhvillojnë ndaj Realit, dhe ditën e hënë pritet që të kryejë edhe vizitat mjekësore te klubi i tij i ri.
