Gianni De Biasi kërkon prej kohësh një skuadër për të drejtuar. Ish-trajneri i Shqipërisë është përfolur si trajneri i mundshëm i Kombëtares së Armenisë dhe ditët e fundit mediat italiane e kanë parë si kandidat serioz të ekipit të Frosinones.
Ekipi i sapoardhur në Serinë A këtë sezon e ka kuptuar se mbijetesa në elitën e futbollit italian duhet të arrihet pas një lufte të pamëshirshme mes skuadrave. Stoli i Frosinones rrezikon të mbetet bosh nga java në javë, duke parë rezultatet zhgënjyese pas shtatë javëve (6 humbje dhe 1 barazim).
De Biasi nuk ka një garë të lehtë për të arritur drejt pankinës së Frosinones. Ish-trajneri i Italisë dhe Torinos Gian Piero Ventura përflitet si njëri prej emrave të mundshëm për të marrë detyrën e trajnerit.
Në këtë situatë, të dy teknikët do të këmbëngulin deri në fund për të marrë përsipër “misionin” e shpëtimit nga “përmbytja”.
