Makth për Interin, njeri gol për të gjithë tifozët e Milanit. Kur duhen më pak se dy javë nga derbi i Milanos, Andry Shevchenko, trajneri i Ukrainës dhe ish-sulmuesi kuqezi, ka dhënë një intervistë të gjatë për Gazzetta dello Sport: “Italia më ka mësuar në shumë mënyra.
Në Itali kam njohur gruan time, aty lindi edhe fëmija im i parë, djali Jordan… Festova në Xhenova me një gol ndaj Sampdorias. Dhe, pastaj, mendoj për ndeshjet ndaj Italisë dhe për atë Botëror 2006 për shembull. Përshëndetja e publikut me një përulje? Po, jemi gjendur edhe herë të tjera në kualifikuese. Kanë qenë gjithmonë ndeshje speciale, sfida të bukura”.
Mbi Serie A – “Juventus me Cristiano Ronaldo është fuqizuar edhe shumë dhe mund të mendojë të fitojë gjithçka, por ka kompeticion. Dhe jam entuziast që Milani im më në fund ka gjetur drejtimin e duhur. Me Paolo Maldinin dhe Leonardon kthehet serioziteti, një seriozitet i madh. Është bërë një merkato e mirë, i jepet besim trajnerit. Asnjë nuk thotë që duhet të fitojnë Champions, sepse janë në ndërtim e sipër, por janë duke u kthyer konkurrues. E gjitha kjo më jep kënaqësi. Serioziteti dhe profesionaliteti i këtij Milani më bëjnë krenar. Duhet të punojnë, por do të kthehen lart”.
Mbi Gatuso – “Rino nuk është vetëm karakter. Ka treguar se është një trajner që di të shtojë diçka te skuadra”.
Mbi Cutrone – “Edhe vitin e shkuar thashë që ishte i zoti. Gjen gjithmonë rrugën për të shënuar dhe për një sulmues është thelbësore kjo gjë. Sakaq, fakti që mund të punojë përkrah Higuain e ndihmon të përmirësohet”.
Mbi Higuain – “Është e drejtë që të ndërtohet skuadra duke menduar për të ardhmen dhe duke afruar sa më shumë të rinj, por Gonzalo është në kulmin e karrierës dhe nuk do të reshtë së shënuari. Një futbollist i mësuar me Serie A. Ka treguar se çfarë di të bëjë: zhvendos ekuilibrat, ndihmon skuadrën, jo vetëm duke shënuar”.
Mbi derbin – “Interi? Ka nisur mjaft keq, por pak nga pak rezultatet janë duke ardhur. Spalletti është një trajner solid dhe Interi ka futbollistë cilësorë, jo vetëm Icardi, një sulmues i madh dhe që është kapiten, lider, njeri kyç për të motivuar shokët”.
Mbi pasardhësin – “Futbollistët e ngjashëm me mua? Jo, por nuk ka kurrë futbollistë të ngjashëm mes tyre. Dhe unë ashtu si isha si futbollist nuk mendoj më. Jam i përqendruar te ajo që jam tani: një trajner që dëshiron të udhëheqë Ukrainën drejt Europianit. Dhe, një ditë do të më pëlqente të stërvisja një skuadër klubi”.
