Mik Shumaker, djali i legjendës Mikael Shumaker, u shpall dje zyrtarisht kampion i Europës në Formula 3. Piloti 19-vjeçar i skuadrës Prema u rendit i dyti në garën e djeshme që u zhvillua në Hokenhaim, por kjo i mjaftoi për të fituar titullin kampion, pasi Mik është shkëputur shumë nga vendi i dytë që mbahet nga Dan Tiktum dhe tashmë titulli ka ardhur edhe matematikisht.
Kështu, djaloshi i ri i familjes Shumaker duket se po ndjek gjurmët e babait, pasi edhe Mikael para se të kalonte në Formula 1, është shpallur kampion në Formula 3, në moshën 21- vjeçare. Djali i Shumit e arrin këtë sukses 2 vite më herët dhe në këtë kampionat ka treguar një nivel të lartë, duke triumfuar në tetë gara.
Tashmë, Mik ka tërhequr vëmendjen e të gjithë botës dhe, nëse vazhdon me këto ritme, shumë shpejt për të do të vijë edhe ftesa nga Formula 1, aty ku babai i tij ka shkruar historinë me 7 tituj të fituar.
