Milan vijon të vuajë një numër të madh dëmtimesh teksa kuqezinjtë sipas të gjitha gjasave do të futen fuqishëm në merkaton e janarit për tu përballur me këtë situatë shumë delicate. Në këtë kuadër, Leonardo dhe Maldini kanë nisur që tani punën me qëllimin e tyre që është përforcimi i kontigjentit me të paktën 2-3 prurje të reja në fillim të vitit 2019. Referuar burimeve të “Calciomercato.com”, duket se Leonardo ka nisur kontaktet me ndërmjetësuesit e Fabregas për të zbuluar situatën.
Kontrata e spanjollit te Chelsea është shumë pranë skadimit dhe mesfushori konsiderohet mes lojtarëve në ikje nga Blutë e Londrës. Paredes dhe Lobotka janë opsione të tjera, por duket se Fabregas mund të jetë lëvizja më e lehtë për tu realizuar në këtë momet. Milan është i interesuar për Fabregas por mbetet ende për tu përcaktuar formula ideale për kuqezinjtë dhe Chelsean gjithashtu. Drejtuesit e Milan duhet të konsiderojnë edhe mënyrën me të cilën do të reduktojnë pagat e larta që përfiton spanjolli. Pavarësisht këtyre dilemave ende të pazgjidhura, transferimi i Fabregas te kuqezinjtë nuk duket më një mision i pamundur.
