Real Madridi e ka ndier mungesën e Ronaldos, i cili vazhdimisht ishte “makinë golash” në “Santiago Bernabeu” dhe e përfundoi karrierën si kryegolashënuesi i të gjitha kohërave të klubit të bardhë, përpara se të nisej për te Juventusi në korrik.
Sezoni më i mirë i Benzema (sa iu takon golave), që nga transferimi i tij te Real Madridi ishte ai 2011-2012, me 32 gola. Ai tha se duhet të marrë më shumë përgjegjësi në sulmin e galaktikëve, pas humbjes së Ronaldos.
“Tani që Cristiano ka ikur, më del për detyrë të shënoj pak më shumë. Jam i detyruar ta bëj këtë, – tha ai për “Real Madrid TV”. – Ndihem shumë i motivuar dhe jam gati për ta kryer më së miri detyrën”.
30-vjeçari tha se klubi madrilen gjithmonë ka kërkuar më shumë prej tij dhe ai është i etur për të ofruar më të mirën e mundshme: “Klubi pret gjithmonë më shumë nga unë. Real Madridi është klubi më i mirë në botë. Gjithkush dhe gjithmonë pret më shumë nga një sulmues, më shumë gola, më shumë asistime, kjo është normale. Jam më i motivuar se kurrë për të pasur një sezon të madh, bashkë me Real Madridin”.
“Los Blancos” do të udhëtojnë për në Eibar të shtunën, në kuadrin e në La Liga-s, përpara se të kthehen në Ligën e Kampionëve tri ditë më vonë, për t’u ndeshur me Romën.