Mbrojtësi i Chelsea-t David Luiz thotë se ata që kritikojnë Jorginho-n nuk marrin vesh nga futbolli, duke shtuar se detyra e lojtarit të përfaqësueses italiane nuk është të përgatisë golat.
Jorginho është sulmuar nga analistët e medies britanike pasi nuk ka bërë asnjë asist këtë sezon, megjithëse ka bërë më tepër se 2,000 pasime. Megjithatë Luiz nxit kritikët e tij shohin statistikat e mesfushorëve të tjerë që qëndrojnë përpara mbrojtjes.
“E kuptoj situatën e Jorginho-s,” shprehet braziliani në prag të gjysmëfinales së Carabao Cup ndaj Tottenham.
“Kur u riktheva te Chelsea mbaj mend ditën e parë kur njerëzit filluan të qeshnin pa treguar pikë respekti.
“Ata mund të kenë opinionin e tyre, por nëse e shprehin me respekt është më mirë. Megjithatë disa njerëz nuk kanë edukatë dhe mirësi. Jorginho është një lojtar i madh.
“Ai kritikohet sepse luan te Chelsea. Kur luan te Chelsea, një ekip i madh, duhet të mësohesh me faktin se të gjithë do të të kritikojnë. Ndërsa kur gjërat shkojnë mirë, të gjithë të duartrokasin.
“Ai po luan sezonin e parë në Angli, diçka jo e lehtë, megjithatë po bën një punë të mrekullueshme. Nuk mendoj se është e drejtë ta kritikosh për numrat e asisteve pa e krahasuar me lojtarë të tjerë që luajnë në atë pozicion.
“Gjithçka varet nga filozofia e lojës tënde. Mendoj se mënyra se si luan ai na mbush ne të tjerët me energji.”
