Ergys Kaçe është ende pezull se çfarë do të bëjë me të ardhmen. Është prej javësh në lajmet e merkatos për një largim të mundshëm nga PAOK, por skuadra e tij e ardhshme nuk dihet ende me siguri. Së fundmi, Platanias është duke kërkuar me ngulm shërbimet e shqiptarit, mirëpo në radhë të parë është vendosur Panathinaikos.
Kjo e fundit, pas tratativave me PAOK-un për një futbollist brazilian, kërkon me ngulm edhe shërbimet e mesfushorit shqiptar.
Në ditët e para të kësaj jave pritet që të vendoset se çfarë do të ndodhë me Kaçen, nëse Panathinikos do të zyrtarizojë transferimin apo mesfushori i Kombëtares do të mbetet në merkato.
Te PAOK është e sigurt që ai nuk mund të gjejë hapësira dhe në rast se merkato nuk do të sjellë asnjë skuadër të re për shqiptarin, atëherë karriera e tij do të vihej realisht në rrezik në gjashtë muajt e mbetur të sezonit.
