Milani rigjen fitoren, por ndërkohë është ende në kërkim të Kristof Piontek. Sulmuesi polak, ai që shihej si blerja më e goditur e merkatos së viteve të fundit kuqezi, papritur ka vendosur që të “zhduket” në drejtim të paditur dhe këtë e konfirmojnë edhe shifrat.
Për numrin 19 kuqezi, tashmë minutat pa shënuar gol kanë shkuar në 507 në kampionat, sepse nuk shënon që prej 6 prillit kundër Juventusit.
Por për ta vërtetuar edhe më shumë krizën e 23-vjeçarit, Piontek ka një tjetër shifër: ish-sulmuesi i Xhenoas nuk arrin të dërgojë qoftë një goditje në kuadrat prej 366 minutash me radhë. Shkurt, baruti i pistoletave të Piontekut ka kohë që është lagur…
