Barcelona pa nisur zyrtarisht merkato verore ka nënshkruar me një nga talente, i cili ra më shumë në sy këtë sezon. Bëhet fjalë për mesfushorin e Ajaksit, Frenki De Jong. Holandezi do të bëhet për çështje ditësh futbollist i Barcelonës, ndërkohë që është përfolur se me afrimin e 21-vjeçarit do të largohet Ivan Rakitiç, i cili nuk ka përmbushur pritshmëritë e drejtuesve këtë sezon.
Megjithatë, vetë kroati është shprehur se kërkon të qëndrojë te Barcelona dhe se ardhja e De Jong nuk ka të bëjë me të, teksa shton se De Jong mbulon një pozicion tjetër në fushë. “ Më bëhet qejfi që drejtuesit e kanë marrë De Jong. Para së gjithash është një djalosh i ri dhe po luan shumë mirë. Çdo lojtar kualitativ është i mirëpritur. Por, secili ka vendin e tij në skuadër.
Ai nuk ka ardhur për të zëvendësuar, vendi im është i zënë. I uroj shumë fat dhe e respektoj, por ai luan në një pozicion tjetër dhe nuk e kuptoj pse ardhja e tij lidhet me mua”, tha Rakitiç. Mesfushori mesa duket ka vendosur të qëndrojë në Spanjë, pavarësisht ofertave nga Interi.
