Trajneri i Glasgou Rejnxhërsit Steven Gerrard zbuloi për herë të parë arsyet se përse futbollisti i kombëtares së Shqipërisë Eros Grezda nuk mundi të përshtatej me futbollin britanik.
Ish-kapiteni legjendar i Liverpuli tregon se 24-vjeçari nuk u impenjua sa duhet për të fituar vendin e formacionit të titullarit. Për dështimin e Grezdës në Skoci, Xherrard pranon t’i marrë të gjitha përgjegjësitë mbi supe.
“Grezda nuk punoi kurrë dhe për këtë mbaj përgjegjësi vetë. Për të qenë i sinqertë me të, ai donte të largohet dhe të luante. Ne i urojmë të gjitha të mira. Është kthyer te Oshijeku, kështu që nuk ka asnjë problem atje”, shprehet 39-vjeçari anglez.
Një dëmtim i gjatë si dhe një incident në një turne miqësor ku pështyu njërin prej lojtarëve kundërshtarë i mbyllën përfundimisht dyert lojtarit kuqezi për të vazhduar karrierën me Glasgoun. Ai u rikthye në Kroaci te Oshijeku, ku ka kujtime të bukura.
