Performancat e shkëlqyera në fushën e lojës dhe interesimi i klubeve më të mëdha në Europë kanë bërë që vlera e Marash Kumbullës të rritet ndjeshëm në merkato. Mbrojtësi i Kombëtares shqiptare bashkë me Luis Alberton janë dy lojtarët e kampionatit italian që kanë pësuar më shumë rritje kohët e fundit.
Kartoni i mbrojtësit të Veronës është 25 milionë euro, duke u bërë kështu lojtari shqiptar më i shtrenjtë në qarkullim, bashkë me Tomas Strakoshën. Të dy futbollistët kuqezinj janë të parët në Kombëtaren shqiptare dhe këtë e kanë arritur me ndeshjet e shkëlqyera në Serinë A.
Kumbulla konsiderohet si një nga talentet më të mëdha të kampionatit italian dhe rritjen e tij po e ndjekin skuadra të mëdha si Interi, Juventusi dhe shumë të tjera në Europë. Dortmundi dhe të tjera skuadra në Angli duan të transferojnë shqiptarin në verë, edhe pse Interi duket i avantazhuar.
