Gara e Çmimit të Madh të Bahrein, që do të organizohet më 22 mars, do të zhvillohet pa praninë e tifozëve, për shkak të coronavirus. Organizatorët e këtij eventi, i dyti sezonal në Formula 1 (më 15 mars garohet në Australi), kanë marrë vendimin si masë për parandalimin e virusit vdekjeprurës.
“E kuptojmë pakënaqësinë e tifozëve, por në një event të tillë, ku marrin pjesë mijëra njerëz, është e rëndësishme të mendojmë për sigurinë e spektatorëve”, thanë organizatorët e garës.
Coronavirus në Bahrein ka infektuar deri më sot 83 persona, shumica e të cilëve persona që kanë ardhur nga Irani. Ndaj, për të evituar që situata të përkeqësohet, u vendos që gara të zhvillohet më dyer të mbyllura.
Gara e parë sezonale do të zhvillohet këtë fundjavë, më 15 mars, në Australi. Për këtë garë nuk ka asnjë problem dhe ajo do të zhvillohet normalisht me praninë e tifozëve.
