Edinson Cavani ka qenë pa dyshim goditja e bujshme e ditës së fundit të merkatos, të paktën në Premier League.
Matador ka nënshkruar për Manchester United duke kompletuar një repart sulmues ku mungonte pikërisht një qendërsulmues i pastër.
Për uruguaianin kanë ardhur elozhet e një njeriu që i njeh shumë mirë Djajtë e Kuq: Ryan Giggs, trajneri aktual i Uellsit.
“Cavani ka luajtur kundër Uellsit në ndeshjen time të dytë si trajner i kombëtares dhe duhet të them se në atë rast ka qenë edhe më i mirë se Suarez”, ka deklaruar Giggs për Matador në një intervistë të dhënë në kanalin YpuTube Ëebby&O’Neill.
“Sinqerisht, nuk mendoja të ishte aq i fortë. Tani ka kohë që nuk luan, kështu që mund të ndihet pak i ndryshkur, por Manchester United ka gjetur atë që duhej dhe atë që kërkonin tifozët: një qendërsulmues të vërtetë”.
“Skuadra ka Marcus Rashford, Martial, që është gjysmë sulmues krahu dhe gjysmë qendërsulmues. Por Cavani është një sulmues i vërtetë”.
“Ka eksperiencë dhe shpresohet që t’i përmirësojë gjërat për skuadrën dhe njëkohësisht t’i ndihmojë shokët e tjerë të skuadrës që të përmirësohen siç ka ndodhur me Bruno Fernandes”, ka thënë Giggs.
