Teuta bën gati goditjen e madhe në merkaton e verës. Pas largimit të Dejvi Bregut dhe dëmtimit të Lorenco Vilës, krahët e sulmit të kampionëve u dobësuan, por një holandez pritet të jetë risia e skuadrës të Edi Martinit në ditët e ardhshme. “Panorama Sport” zbulon nga burime të sigurta se klubi është pranë firmës me 28- vjeçarin Arsenio Valport.
Sulmuesi i krahut të majtë sapo ka mbyllur kontratën me ekipin e Superligës qipriote, Ermis Aradipu, aty ku luajti së fundmi edhe mesfushori që ka qenë më parë pjesë e Teutës dhe që ka firmosur aktualisht për Dinamon Lancinet Sidibe.
Valport është një lojtar shumë i shpejt dhe ka një gjithashtu një raport të mirë me golin në karrierën e deritanishme. Ai ishte në pjesën e parë të sezonit 2020-2021 te Dordreht në Ligën e Dytë holandeze, ndërsa në janar iu bashkua qipriotëve të Ermisit, ku në 15 ndeshje shënoi 2 gola.
KARRIERA – Arsenio Valport e ka nisur karrierën te skuadra e njohur holandeze, Herenven, në sezonin 2011-2012. Ai luajti 18 ndeshje në “Eredivisie” nga ku 9 prej tyre me fanellën e Zuolles. Transferta e parë jashtë vendit e sulmuesi ishte në Hungari, pikërisht te klubi i Ferencvarosh, aty ku qëndroi vetëm një sezon (10 ndeshje-1 gol). Më pas u kthye në Holandë te klubi RKC Ualvik, ku shkëlqeu në dy kampionate radhazi, pasi në 50 ndeshje me këtë skuadër, arriti të shënojë 11 gola.
Valport u ble në vitin 216 nga Beitar Jeruzalem, por qëndroi pak në Izrael. Sulmuesi ka një eksperiencë të shkurtër edhe në Korenë e Jugut me Busan Ipark, për të vazhduar më pas në Belgjikë te KSV Rozelare. Ekselsior dhe Dordreht në Holandë, si dhe Ermis në Qipro janë tri ekipet e fundit ku 28-vjeçari është aktivizuar. Lojtari me origjinë nga Surinami pritet të zyrtarizohet nga durrsakët në ditët në vijim. Në total në 184 ndeshje, Valport ka shënuar 40 gola.
