Xhorxhino Vajnaldum është i hapur për mundësinë e transferimit tek Arsenali, pasi nuk po arrin të gjejë hapësira në skuadrën e PSG-së pas transferimit me parametër zero nga Liverpuli në verë.
Mesfushori holandez, i cili fitoi Ligën e Kampioneve dhe Premier Ligën me “Reds”-at, dëshiron të largohet nga Parisi me mundësinë e parë që do t’i jepet.
Trajneri Mauricio Poçetino preferon Verratin, Pereiran, Herrerën dhe Paredesin përpara Vajnaldumit në mesfushë. Dhe sipas “Sky Sports”, një opsion është Arsenali, i cili pëlqehet nga futbollisti dhe ai do ta pranonte me kënaqësi një huazim.
Për momentin futbollisti është i dëmtuar, por “Topçinjtë” po kërkojnë një mesfushor dhe atij do t’i pëlqente që të rikthehej në Premier Ligë.
Nuk përjashtohet edhe një shkëmbim me Ndombelenë e Totenhemit, i cili përflitet për një transferim te gjigantët francezë.
