Në ditën e zyrtarizimit të Matajs de Ligtit te Bajerni i Mynihut, në klub ka prishur entuziazmin lajmi i dëmtimit të Leon Goreckës.
Lideri i mesfushës së kampionëve të Gjermanisë mësohet se nuk do të udhëtojë me skuadrën në turneun e programuar në Shtetet e Bashkuara të Amerikës, pas një problemi të hasur në gjurin e majtë.
Madje, burime pranë klubit gjerman bëjnë me dije se Gorecka i është nënshtruar dje edhe një operacioni për të përshpejtuar kohët e rikthimit në fushë, ndonëse kjo do të thotë se 27-vjeçari do të humbë fillimin e sezonit me skuadrën e tij.
Për sa u përket kohëve të rikuperimit, ato do të variojnë nga 6-8 javë, prandaj për Bajernin e Mynihut ndoshta profilizohet një tjetër ndërhyrje në merkaton e kësaj vere, për të pasur një zëvendësues të Leon Goreckës.
Kujtojmë se pas turneut veror përtej Atlantikut, kampionët e Bundesligës do të debutojnë në kampionat më datë 5 gusht, kundër rivalëve të Frankfurtit.
