Turneu i Masters i Majemit në tenis duket se nuk ka qenë shumë me fat për “numrat 1” të të dyja kategorive.
Pas eliminimit të Roger Federer, që nga 2 prilli do të humbasë edhe kreun e renditjes botërore, sot i ka thënë lamtumirë turneut amerikan edhe tenistja rumune Simona Halep, numri 1 në botë për femra.
Në raundin tretë të turneut të Majemit, tenistja rumune u mund 2-1 nga polakja Agnieszka Radwanska (3-6, 6-2, 6-3), një fitore me përmbysje e tenistes polake.
Por Halep, ndryshe nga Federer, nuk rrezikon të humbasë kryesimin, pasi edhe numri 2 në botë për femra, danezja Caroline Wozniacki, është eliminuar nga Masteri i Majemit.
Për sa i përket tenisteve të tjera pretendente për të fituar në këtë Masters, një paraqitje të mirë po bëjnë spanjollja Garbine Muguruza, bjellorusja Victoria Azarenka, tenistja amerikane Venus Williams dhe ajo çeke Karolina Pliskova, që kanë avancuar për në turin çerekfinal.
