Te skuadra Mercedes ka shumë optimizëm për të ardhmen, sidomos nga ana e pilotit finlandez Valtteri Bottas, që mendon se njëvendëshja e re që po përgatitet për vitin 2018 është e përshtatshme për stilin e tij të pilotimit.
Finlandezi debutoi gjatë 2017-ës te makina gjermane ku zëvendësoi Nico Rosberg, një detyrë jo e lehtë, por që Bottas e kreu mirë. Pas fitoreve të para në karrierë të arritura gjatë botërorit të kaluar të Formula 1, piloti finlandez shprehet se gjatë 2018-ës do të kërkojë diçka më shumë.
“Edhe pse makina Mercedes e vitit 2017 ishte e shpejtë, nuk ishte shumë e përshtatshme për tipin tim të pilotimit. Gjithsesi, unë dhashë më të mirën dhe besoj se u paraqita denjësisht. Jam i kënaqur nga puna që inxhinierët kanë bërë për makinën e re dhe nga ajo që kam parë, mendoj se njëvendëshja e re është më e përshtatshme për mua. E pranoj se mes makinës time dhe asaj të Hamilton ka disa ndryshime, për të na e bërë më të lehtë pilotimin”, u shpreh Valtteri Bottas, që u rendit i treti gjatë 2017-ës.