Roberto Mancini, sikurse tashmë është përfolur shumë, është njëri prej kandidatëve të mundshëm për tu emëruar në rolin e trajnerit të kombëtares së Italisë. Nevojitet një emër i madh e i konfirmuar për të rindërtuar përfaqësuesen azzurre të dërrmuar nga dështimi që nuk u kualifikua në finalet e Botërorit Rusi 2018, ndërkohë që e ardhmja mbetet akoma për tu shkruar.
I kontaktuar nga “calciomercato.it”, Mancini i është përgjigjur kështu pyetjes relative në lidhje me të ardhmen e tij: “Takim me Costacurta? Jam nën kontratë me Zenit, si t’ja bëj tani. Vëmendja jonë tani qëndron te shanset për të përmbysur rezultatin e mbrëmshëm, disfatën ndaj Celtic, për Europa League”. Fjalë të pakta, por konçize ato të ish-teknikut të Inter dhe Manchester City, që shfaqin vullnetin e trajnerit për të stërvitur Italinë, por që në të njëjtën kohë thekson detyrimet kontraktuale që duhen respektuar me klubin rus, kontrata me të cilin skadon në 2020.
