Në box-et e Ferrari-t ka ndodhur një incident i frikshëm ku protagonist ka qenë piloti Kimi Raikkonen. Piloti i “Kokëkuqes” ishte futur për herë të dytë në pit-stop gjatë garës së Çmimit të Madh të Bahreinit dhe i dha gaz mjetit përpara se një prej mekanikëve të kishte mbaruar punën e tij.
Mekaniku po punonte në gomën e majtë të pasme dhe u shtyp nga makina. Ai qëndroi shtrirë për një kohë të gjatë, përpara se të merrej me barelë dhe të transportohej në spital. Punonjësi i box-it ishte përgjegjës për zëvendësimin e pneumatikëve.
Piloti finlandez, që në ato momente ishte në vend të tretë, u bllokua menjëherë përpara se të dilte nga korsia e box-it dhe gara e tij përfundoi aty. Ai doli nga makina i shokuar për incidentin. Sipas mjekëve, mekaniku kishte një thyerje të këmbës dhe ai është nën kujdesin e mjekëve.
