Nuk kanë fund polemikat pas garës, mbi të gjitha pas konfliktit mes Marquez dhe Rossi-t. Pas Giacomo Agostini-t, piloti spanjoll gjen një tjetër aleat në ekipin e tij, pikërisht menaxherin e skuderisë Alberto Puig, i cili justifikon plotësisht edhe problemet e tij në nisje.
“Mendoj se ishte një ditë shumë e komplikuar për Marc. Nuk është plotësisht e qartë se si ka ndodhur, normalisht motori del dhe nga ai moment rrodhën situata të komplikuara, duke sjellë dhe vonesa. Sigurisht, piloti ka bërë atë që mendonte se ishte më e mira. Ka menduar se komisari i ka kërkuar që të rivendosej në pozicion”.
Puig më pas ka folur për kontaktet gjatë garës me Aleix Esparagaro-n dhe mbi të gjitha me Valentino Rossi-n. “Marquez ka shpjeguar mirë se çfarë ndodhi me Esparagaro-n, është e vërtetë që ka mbërritur shumë shpejtë mbi të, por po i jepte motorit shumë shpejtë. Për sa shihet problemi me Valentino-n, nëse shihni skenat në TV, mund të dalloni që në atë kthesë kishte ujë në trajektore. Rrota e përparme e Marc u bllokua dhe duhet të lëshonte frenat, kishte hapësirë, nuk ishte në limite, por fatkeqësisht ka prekur Valentino-n që më pas u rrëzua”.
“Ndjejmë keqardhje për atë që ndodhi, por ishte vetëm një incident në garë. Ne besojmë te deklaratat e pilotëve tanë. Marc pasi u kthye në bokse ka thënë se dëshironte të kërkonte falje dhe t’ua shpjegonte të gjithëve. Ishte një vendim i tiji kur po shkonte në bokset e Yamaha-s. Por i kanë kërkuar që të largohet. Më pas e kuptoni. Nëse kjo i ndodh pilotit tënd, nervozohesh. Por e përsëris: Është vetëm një rrugë, çfarë mund të bëjmë? Kërkojmë falje. Kjo nuk është pranuar. Kështu që nuk ka kuptim që të vijojmë diskutimin”.
