Piloti australian Daniel Ricciardo me Red Bull është më i shpejti në pistën e Sakhir në përfundim të sesionit të parë të provave të lira në Formula 1, të vlefshme për garën e Çmimit të Madh të Bahrein. Pilot ii Red Bull dha kohën 1’31”060 në pistën e ndërtuar në mes të shkretëtirës, duke qenë i pakapshëm për rivalët. Në vendin e dytë u klasifikua Valtteri Bottas me Mercedes, ndërsa në të tretin Kimi Raikkonen me Ferrari.
Dy protagonistët e garës së kaluar dhe pretendentët për titull, Sebastian Vettel (Ferrari) dhe Lewis Hamilton (Mercedes), zunë respektivisht vendet 4-5 në përfundim të sesionit të parë. Madje piloti britanik ishte më shumë se 1 sekondë i avashtë së Ricciardo. Ky sesion i parë i provave të lira u zhvillua me dritën e diellit, ndërsa sot në mbrëmje do të zhvillohet sesioni i dytë, me drita artificiale, që është njësoj me kushtet e garës.