Vettel mendon se vendi i dytë në pistën e Montekarlos është një rezultat i mirë në prag të garës së nesërme së Çmimit të Madh të Monakosë në Formula 1. Fakti që piloti gjerman i Ferrarit do ta nisë garën nga vija e parë e startit, në krah të Daniel Ricciardo (australiani me Red Bull siguroi “pole position”) i jep mundësi ferraristit të shpresojë për fitore.
“Kjo është një garë me shumë të papritura, e vështirë të parakalosh. Do të shohim se si do të shkojë starti i garës, pasi ai është shumë i rëndësishëm, duke shpresuar në një nisje të mirë”, tha Vettel, që përgëzon Ricciardo për kohën e dhënë në provat zyrtare.
“Red Bull ishte shumë e shpejtë. E dinim që do të ishin të shpejtë, por edhe ne rezistuam. Makina jonë ka potencial, ndaj do ta shfrytëzojmë deri në fund për të fituar dhe të shpresojmë te surprizat e garës, që të jenë në favorin tonë”, u shpreh Sebastian Vettel.