Falë fitores tenistike 6-1 kundër Panamasë Anglia renditet e para në Grupin H së bashku me Belgjikën në kuotën e 6 pikëve. Të dy këto kombëtare kanë siguruar kualifikimin në fazën me eliminim direkt, ndërkohë që ndeshja e fundit në grup korrespondon ndaj njëra-tjetrës.
Por nëse jeni përgatitur të shikoni një superpërballje mos u habisni shumë nëse në fushë si Belgjika dhe Anglia do të kërkojnë të humbasin.
Arsyeja? Llogaritë që bëhen për fazat e mëvonshme.
Kështu, duke marrë parasysh llogaritë e grupeve deri më tani, teksa janë luajtur dy nga tre takimet e grupeve, Belgjika me vendin e dytë aktual do të luante me Japoninë në turin e ardhshëm, ndërsa sfida e vërtetë do të priste deri në gjysmëfinale, atje ku do të gjendej Spanja.
Nga ana tjetër fituesi i grupit mes Belgjikës dhe Anglisë nuk do të kishte shumë kohë për të festuar, pasi pas përballjes me Senegalin, e presin emra të frikshëm si Brazili, Gjermania, Franca, Portugalia, pa harruar edhe një kualifikim të mundshëm të Argjentinës. Atëherë, pyetja është e thjeshtë, kujt i intereson të fitojë në ndeshjen mes Belgjikës dhe Anglisë?
