E ardhmja e trajnerit Mirel Josa në krye të Prishtinës është vënë në dyshim. Trajneri shqiptar nuk ka bërë një performancë bindëse, ç’ka ka detyruar drejtuesit e klubit të nisin kërkimet për zëvendësuesin e tij. Sipas gazetës “Olle”, numri një i klubit kosovar, Remzi Ejupi, ka qenë i pranishëm një ditë më parë në Vlorë, ku ka ndjekur nga afër përballjen Flamurtari- Skëndërbeu.
Siç mësohet, në përfundim të kësaj ndeshje, ai ka zhvilluar një takim me Gentian Mezanin, i cili shihet nga presidenti si emri i duhur për t’u ulur në krye të stolit të Prishtinës. Mezani aktualisht është i papunë, teksa më herët ka qenë trajner i Flamurtarit nga viti 2016-2017, e ndërsa së fundmi ishte në krye të Laçit, ku arriti të kualifikonte skuadrën në Europa League dhe të arrinte deri në finalen e Kupës së Shqipërisë. Megjithatë, pavarësisht këtij suksesi, 38-vjeçari dha dorëheqjen për arsye personale.
Interesimi në Kosovë për trajnerët shqiptarë duket se është në nivele maksimale, pasi vetëm një ditë më parë, Shpëtim Duro u zyrtarizua si trajneri i ri i Dritës.
