Një aventurë e re mes Fernando Alonso dhe Ferrarit mund të nisë vitin 2020 në Formula 1. Lajmin e ka konfirmuar ish-drejtori sportiv i “kokëkuqes”, Stefano Domenicali, njeriu që punoi për 5 vite me radhë me pilotin spanjoll, para se të dy të largoheshin nga makina italiane, pa asnjë titull kampion.
“Siç u rikthye Kimi Raikkonen mund të rikthehet edhe Fernando Alonso. Do të ishte diçka fantastike. Alonso është një pilot i madh dhe me një Ferrari kompetitive, si kjo e tanishmja, mund të triumfojë me shumë lehtësi dhe të shpallet kampion. Unë jam i bindur”, tha Domenicali.
“Natyrisht që vendimin përfundimtar do të marë skuadra, që tashmë ka një pilot me përvojë dhe një të ri. Alonso mund të zërë fare mirë vendin e të dytë nëse vendos të rikthehet. Spanjolli tha se kjo është një mirupafshim, jo një lamtumirë. Do të isha lumtur nëse kjo gjë do të ndodhte”, u shpreh Domenicali, njeriu që ka punuar 23 vite te Ferrari.
