Organizatorët e Lojërave Olimpike “Tokio 2020” kanë deklaruar se rrugëtimi i flakës olimpike do të nisë nga nje vend i veçantë, nga qyteti i Fukushimës. Ky qytet dhe zonat përreth tij, në vitin 2011 u goditën nga një tërmet i fuqishëm e më pas nga një tsunami, duke krijuar edhe një katastrofë nukleare, për shkak se në atë zonë ndodhet një central i madh bërthamor.
Viktimat ishin të shumtë dhe ato ditë ishin të vështira për Japoninë, ndaj organizatorët kanë vendosur që rrugëtimi i pishtarit me flakën olimpike të nisë nga ky qytet. Flaka olimpike do të ndizet, si gjithnjë, në Athinë dhe më 26 mars të vitit 2020 do të mbërrijë në Japoni. Dhe rrugëtimi i saj do të nisë nga qyteti i Fukushima.
“Për ne ky është një moment i veçantë dhe duam të kujtojmë se jemi pranë këtyre njerëzve. Në fund të fundit, ky është edhe mesazhi që përcjell ky event olimpik”, thanë organizatorët e këtij eventi. Flaka olimpike do të udhëtojë më pas për 121 ditë në qytetet e Japonisë, për të mbërritur në Tokio më 24 korrik, ditën që nisin Lojërat Olimpike (24 korrik-9 gusht 2020).
