Panik paraditen e sotme në bokset McLaren, në pistën spanjolle të Montmelo. Makina britanike ishte duke kryer disa teste private gjatë “filming day”, ditë ku skuadrat kryejnë 100km për të xhiruar reklamat e sponsorëve të tyre në Formula 1.
Gjatë kohës që makina McLaren MCL34 po dilte në pistë ndodhi një incident. “Zjarri që u krijua në bokse u fik shumë shpejt nga punonjësit dhe forcat e sigurisë së pistës. Stafi mjekësor i pistës mbërriti menjëherë për të dhënë ndihmën për personat që kishin nevojë”, thuhet në deklaratën e McLaren.
3 anëtarë të skuadrës McLaren përfunduan në qendrën mjekësore të pistës së Montmelo për shkak se kishin marrje mendsh për shkak të tymit. Por shpejt ata u rikthyer në bokse dhe puna vijoi normalisht. Ende nuk dihen shkaqet që sollën në këtë incident, për fat pa pasoja në bokset McLaren.
