Ende pa nisur sezoni 2019-2020 vjen dëmtimi i parë për skuadrën e Lakers, një nga favoritet për titullin kampion në NBA. Basketbollisti Anthony Davis, i ardhur këtë verë, është dëmtuar në kyçin e dorës së djathtë.
Dëmtimi erdhi në miqësoren që Lakers luajtën ndaj Brooklyn (skuadra e Nets fitoi 91-77). Davis e la në mes ndeshjen, ende pa u mbyllur pjesa e parë.
Nuk dihet se sa kohë Anthony Davis do të qëndrojë jashtë fushave edhe pse rezonanca tregoi së dëmtimi nuk është i rëndë. Bëhet fjalë për një ndrydhje të shkallës së parë, duke evituar këputje të ligamenteve.
Gjithsesi, ende nuk dihet nëse ylli i Lakers dhe NBA-së do të jetë në fushë për ndeshjen e parë sezonale, derbin e Los Anxhelosit, ndaj Clippers.
