“Luajmë dhe rindërtojmë së bashku”. Kjo është motoja e ndeshjes miqësore që yjet e Shqipërisë, Italisë, Greqisë dhe Turqisë do të luajnë mes tyre nesër në orën 18:00 në stadiumin “Air Albania”.
Ky aktivitet zhvillohet për qëllime bamirësie, pasi të ardhurat që do të sigurohen nga shitja e biletave do të shkojnë në ndihmë të të prekurve nga tërmeti i fuqishëm që goditi vendin më 26 nëntor.
Çmimet e biletave për këtë eveniment janë nga 5 mijë lekë të vjetër deri në 100 mijë lekë të vjetër. Do të zhvillohen 3 ndeshje nga 30 minuta, fillimisht dy gjysmëfinale, që më pas do të nxjerrin edhe finalen.
Ndërkaq muzika nuk do të mungojë në këtë eveniment dhe janë zbuluar emrat e tyre. Reperi Mc Kresha, Dj Vin Veli dhe FINEM, janë të ftuarit e FSHF-së dhe ata që pritet të ndezin atmosferën përpara nisjes së ndeshjeve miqësore.
