Gara e parë sezonale e Formula 1 pati si zhgënjimin më të madh pilotin britanik Lewis Hamilton. Fillimisht penalizimi me 3 pozicione para startit të garës dhe më pas një penalizim me 5 sekonda në fundin e saj, padyshim që ndikuan në rezultatin final.
Hamilton e kaloi vijën e finishit i dyti në pistë, pas shokut të tij të skuadrës Valtteri Bottas, por penalizimi e zbriti në vendin e katërt. “U përpoqa të bëja gjithçka. Arrita të dueloj me Bottas, por ai kontakt me Albon me prishi gjithë garën”, tha britaniku i Mercedes.
“Nuk e prisja penalizimin nga komisarët e pistës, pasi ishte thjesht një kontakt gare, që ndodh shpesh në pistë. Gjithsesi, e pranoj penalizimin. Kjo garë përfundoi, tani mendoj për sfidën e radhës. Kjo fundjavë nuk ishte optimale për mua, pasi edhe të shtunën gabova”, tha Hamilton.
Gara e radhës, ashtu si e para, sërish në pistën austriake të Zeltweg, më 12 korrik.
