Max Verstappen ia doli të fitonte titullin e parë në Formula 1, teksa e bëri realitet ëndrrën e tij duke parakaluar Lewis Hamilton në xhiron e fundit në pistën e Yas Marina në Abu Dhabi. Piloti holandez ndërpreu diktatin e britanikut, i cili ka koleksionuar shtatë tituj botërorë.
Në këtë formë, festa ishte e jashtëzakonshme për 24-vjeçarin, i cili gjatë gjithë sezonit ka pasur performancë fantastike. Kështu, pasi u mbyll ceremonia në pistë, gjithçka u zhvendos në garazhin e Red Bull me pjesëmarrësit të cilët ishin të pajisur me bluzën e dedikuar për pilotin kampion. Pije, foto dhe muzikë, ndërsa nuk mungoi edhe një xhiro e Verstappen në pistë shoqëruar me thirrjet “kampion”.
Sakaq, Verstappen kishte menduar për një festë e cila do të zgjaste pambarimisht dhe më pas me miqtë e tij më të ngushtë, holandezi u zhvendos në një nga jahtet pranë pistës duke qëndruar deri në orën shtatë të mëngjesit, atëherë kur të gjithë i kishin konsumuar të gjitha energjitë e tyre.
