Valon Et’hemit i është dashur pak kohë që të kthehet në një nga emrat më të rëndësishëm në kategorinë e dytë turke te skuadra e Istanbulspor. Ish-kapiteni i Kukësit po luan me rregullsi dhe po aq rregullisht është vendimtar me atë që po shfaq në fushë pasi po shënon gola e jep asiste.
Sot, Et’hemi ka shënuar golin e tij të tretë personal në këtë sezon në suksesin 2-1 të Istanbulspor ndaj Samsunspor, në radhët e të cilit mungonte Eraldo Çinari. Mesfushori shënoi golin e parë të ndeshjes me një gjuajtje spektakolare nga jashtë zonës, duke lënë të shtangur portierin e skuadrës mike.
Për Et’hemin ky ishte goli i tretë në këtë kampionat, ku është një nga lojtarët më vendimtare, pasi kryeson listën e lojtarëve me më shumë asiste, sepse ka dhënë 7 të tillë në 16 ndeshje të luajtura. Suksesi i sotëm i dha mundësinë Istanbulspor të ngjitej në vendin e 6, duke u futur në zonë e play-off.
