Ndoshta pak janë dëgjuar pas viteve ’90, por pikërisht në ditët e fundit të regjimit komunist, dy lojtarët e Shpresave të Shqipërisë, Albert Stroni dhe Ilir Sina, bënin bujë me arratisjen e tyre në Spanjë.
Gjithçka ndodhte dy ditë pasi Shqipëria U-21 mundej 0-1 në Huelva përballë Spanjës U-21 ku mes të tjerëve bënin pjesë emra të mëdhenj si Pep Guardiola, Abelardo dhe trajneri i sotëm i Spanjës, Luis Enrike.
Ishte 19 dhjetori 1990, kur Ilir Sina, 20 vjeç, Albert Storni, 19 vjeç, vendosën të arratiseshin, duke mos iu bashkuar pjesës tjetër të skuadrës që po merrte rrugën e kthimit drejt Shqipërisë.
Të dy lojtarët, në orën 16:00, duhej të paraqiteshin në hotelin në Sevilje ku ndodhej delegacioni shqiptar. Por teksa autobusi i priste për t’i shoqëruar drejt aeroportit, asnjëri prej tyre nuk u bë i gjallë.
Ata kishin plane të tjera. Pasi kishin kaluar natën në një nga diskot e qytetit andaluz, në orën 10:00 të mëngjesit të së mërkurës ata mbërrijnë në komisariatin e policisë së Seviljes për të kërkuar strehim politik në Spanjë.
HISTORIA – Sina dhe Stroni kishin dalë mëngjesin e së mërkurës për bërë pazar në Sevilje të shoqëruar nga përkthyesi i vënë në dispozicion nga Federata Spanjolle.
Pasi bënë shoping, të dy lojtarët u kthyen në hotel ku ishin shokët e ekipit për t’i dhënë dhuratat për familjen, orë dore dhe magnetofon, duke u thënë këtyre të fundit se e kishin ndarë mendjen për të qëndruar në Spanjë.
Në këtë mënyrë, historia vijon me endjen rrugëve e klubeve të Seviljes derisa në mëngjesin e së enjtes kur shkojnë për t’u dorëzuar në polici.
KONTAKTET – Për dy lojtarët ekipit Shpresa nuk dihej asgjë deri në orën 09:00 të mëngjesit të së enjtes. Për habi të të gjithëve largimi i tyre nuk është se bëri zhurmë në delegacionin shqiptar.
Autobusi i ekipit Shpresa u nis për në Madrid mbrëmjen e së mërkurës pa denoncuar mungesën e dy lojtarëve. Në polici, Stroni dhe Sina kanë rrëfyer se e kishin kaluar natën në disko në Sevilje, teksa më vonë ata u strehuan në selinë e Kryqit të Kuq në Sevilje.
Të dy lojtarët rrëfyen se ishin problemet ekonomike dhe politike që i shtynë të kërkonin azil në Spanjë.
