Ditën e djeshme, policia e Guernsit vendosi të mbyllte kërkimet për aeroplanin e zhdukur ku gjendej edhe futbollisti argjentinas Emiliano Sala. Në pamundësi për të gjetur gjurmë prej tij, ata kanë publikuar një njoftim që kërkimet janë mbyllur dhe se gjasat për shpëtimin e Salas dhe pilotit janë pothuajse të pamundura.
Por, ditën e sotme, nëpërmjet një videomesazhi, është motra e tij që i bën thirrje të gjithëve, të bashkohen që kërkimet të vazhdojnë. Ajo duket tepër e dëshpëruar, dhe kërkon ndihmën e të gjithëve, që të çojnë që kërkimet për vëllain e saj të vazhdojnë.
“Përshëndetje të gjithëve. Jam Romina Sala, e motra e Emilianos. Ju kërkoj të gjithëve, ju lutem, të ndihmoni me ndonjë postim në rrjetet sociale, me ndonjë status apo foto, të kërkoni që të vazhdojnë kërkimet. Duhet ta gjejmë atë, më jepni forcë, ju lutem. Më ndihmoni, ai është gjallë! Ju përgjërohem më ndihmoni.” – shprehet e motra e sulmuesit të zhdukur, Emiliano Sala.
