Ioan Becali, menaxher futbollistësh dhe mik personal i José Mourinho, foli në “Telekom Sport Romania” për të ardhmen e trajnerit portugez, që u shkarkua nëntorin e kaluar nga Manchester United. Ai tha se “Special One” ka refuzuar një “çek të bardhë” nga Federata Kineze e Futbollit për të marrë përsipër drejtimin e ekipit kombëtar dhe zhvillimin e këtij sporti në vendin aziatik.
Agjenti rumun kohët e fundit udhëtoi për në Londër dhe pati mundësinë për t’u takuar me Mourinhon. “Ne u takuam në mëngjes, në një hotel pranë shtëpisë së tij, dhe më tha se kishte marrë një ofertë nga Kina, për të drejtuar ekipin kombëtar atje. Përpara i ishte vendosur një kontratë bosh, ku ta shkruante vetë shifrën financiare që donte. Mourinho më tha: Unë jam 54 vjeç, dua të punoj edhe për pesë vite në Europë dhe pasi të mbush 60 vite, do të shkoj në Kinë”.
Jose Mourinho, kohët e fundit afirmoi synimin e tij për të vazhduar të drejtojë në kontinentin tonë, në një klub me objektiva madhorë, ku të ndihet komod. Pas shkarkimit të tij si trajner i Manchester United, portugezi është komentator sportiv në platformën audiovizive “DAZN”.
Ndërkohë, mediat spanjolle shkruajnë sot se Mourinho është kontaktuar përmes menaxherit të vet nga Florentino Perez, duke i kërkuar që të rikthehet në stolin e kampionëve të Europës në fuqi. Mbetet të shihet si do të përparojnë bisedimet dhe nëse portugezi do ta pranojë një eksperiencë të dytë në “Santiago Bernabeu”.