Boksieri britanik Tyson Fury, ish-kampion i botës në peshën e rëndë, ka deklaruar se më 28 shtator do të duelojë sërish. Fury do të ngjitet në ring më 15 qershor, ku do të përballet ndaj gjermanit Tom Schwarz, por ai është i sigurtë për fitoren. Madje britaniku e konsideron këtë duel ndaj Schwarz si një nxehmje për sfidat e mëdha, por pa e nënvlerësuar rivalin. Ndaj ka prenotuar 28 shtatorin për duelin e radhës.
“Pas duelit të qershorit do të rikthehem në ring më 28 shtator. Në 6 muajt që pasojnë do të jem shumë aktiv dhe deri në fund të vitit do të zhvilloj 3 duele”, tha Fury, 27 fitore dhe 1 barazim në karrierën e tij. Britaniku do të duelojë më 15 qershor në Las Vegas, ndërkohë që nuk dihet ende se ku do të zhvillojë duelin e 28 shtatorit (me shumë gjasa sërish në Amerikë).
Duke folur për duelin e 15 qershorit, Fury shtoi: “Nuk do të përsëris gabimet e Wladimir Klitschko, që kur dueloi me mua mendoi se ishte thjesht një ndeshje rutinë, ku do të mbronte titujt. Schwarz është një boksier i fortë, i pamposhtur (24 fitore). Nuk e kam nënvlerësuar dhe nuk do ta bëj këtë gjë deri në fund të duelit, derisa ta mund. Kjo sfidë nuk ka lidhje me axhendën time”.