Skitari kosovar Albin Tahiri ka thënë të jetë i kënaqur me rezultatin e tij në garën e lëshimit me ski në Lojërat Olimpike Dimërorë 2018 në Korenë Jugore, përkundër se zuri vetëm vendin e 50-të të enjten në mëngjes.
Tahiri e përmbylli garën me një kohë prej 1:48.81, duke u radhitur i 50-ti nga totali i 57 garuese, raporton Express.
Në një postim në llogarinë e vet në Instagram, Tahiri ka shkruar se dha më të mirën nga vetja por s’mundi të rrëshqiste më shpejt.
Megjithatë, ai është i kënaqur pasi nuk bëri gabime më të mëdha.
“Bëra më të mirën sot, por thjesht nuk munda të arrija mjaft shpejtësi. Prapëseprapë i kënaqur, sepse nuk bëra gabime më të mëdha. Nesër super sllallom i madh”, ka shkruar Tahiri.
Kosovari do ta zhvillojë nesër garën e radhës, në disiplinën super sllallom të madh.
