E pabesueshmja ka ndodhur pak minuta më parë në pistën e Monza, ku po zhvillohet gara e Çmimit të Madh të Italisë në Formula 1. Një kontakt mes Lewis Hamilton (Mercedes) e Max Verstappen (Red Bull) ndodhi në xhiron e 26-të, pikërisht në mesin e garës.
Piloti britanik sapo doli nga bosket ku ndërroi gomat dhe po mbante anën e brendshme të pistës para kthesës dyshe. Nga vija e drejtë po vinte me shpejtësi Verstappen dhe asnjë nga pilotët nuk hapi krahun, duke përfunduar kështu në kontakt dhe mbyllën para kohë garën.
Aksidenti ka qenë i rrezikshëm, pasi makina e Verstappen ka përfunduar sipër asaj të Hamilton, që u mbrojt nga sistemi “halo”. Makina e sigurisë ka hyrë në pistë dhe ka nisur një hetim i komisarëve, ndërkohë që gara kryesohet nga Daniel Ricciardo me McLaren.