NBA është në dilemë nëse sezoni 2021-2022 duhet të vazhdojë apo ndërpritet për pak kohë, derisa situata me pandeminë Covid-19 të qetësohet. Aktualisht janë 72 basketbollistë të infektuar apo që janë duke aplikuar protokollin e sigurisë, ndërkohë që 5 ndeshje janë shtyrë, pasi skuadrat kanë nga 6 deri në 8 lojtarë të infektuar.
Pas Chicago Bulls, që shtyu dy ndeshjet e saj, tashmë është Brooklyn Nets që kanë probleme me lojtarët, përfshi edhe Kyrie Irving, i rikthyer në ekip pas përjashtimit të përkohshëm (i pavaksinuar). Skuadra e Brooklyn nuk ka numrin minimal të 8 lojtarëve të lejuar për të zhvilluar ndeshjet e NBA-së.
E njëjta situatë edhe me Cleveland Cavaliers, e kthyer në një vatër infeksioni, teksa të dielën janë konfirmuar pozitivë edhe 5 lojtarë të tjerë. Edhe te Philadelphia nuk kanë 8 lojtarë në dispoziocion për të luajtur, ndërkohë që një situatë e ngjashme paraqitet te Toronto e Orlando, që kanë të infektuar edhe pjesëtarë të stafit.
Edhe Lakers ka 6 lojtarë të infektuar, ndërkohë që pozitivë janë edhe trajneri e ndihmësi i tij. NBA i ka bërë më të ashpra masat anti-Covid, u kanë dhënë mundësi skuadrave të marrin lojtarë provizorë për të përballuar situatën, ndërkohë që janë shtuar testet.