Gara e Çmimit të Madh të Australisë, ajo që zakonisht çel Botërorin e Formula 1, do të qëndrojë në kampionat deri në vitin 2025. Si organizatoreët e kësaj gare ashtu dhe drejtuesit e Formula 1 kanë konfirmuar marrëveshjen mes palëve.
Kontrata e mëparshme skadonte në vitin 2023, por palët kanë vendosur ta shtyjnë atë edhe me dy vite të tjera (në vitin 2025 përkon 30-vjetori i garës së parë në Melburn). Në fakt, gara e parë e zhvilluar në Australi daton në vitin 1985 dhe deri në vitin 1995 garohej në pistën e Adelajde.
Nga viti 1996 dhe deri më sot, gara u spostua në Melburn, aty ku zakonisht është zhvilluar sfida e parë sezonale. Pista e Melburnit është ndër më të preferuarat për publikun e këtij sporti, teksa në 3 vitet e fundit janë regjistruar 900 mijë tifozë në “Albert Park”.
